QazCovid-in зерттеулеріне үш мың адам қатысады.

Клиникалық зерттеулердің I/II фазаларының аралық есептерінің нәтижелері COVID-19-ға қарсы отандық QazCovid-in вакцинасының қауіпсіздігі мен иммуногенділігін көрсетті, деп хабарлайды «Қазинформ».

Қазіргі уақытта ҚР БҒМ Ғылым комитетінің Биологиялық қауіпсіздік проблемалары ғылыми-зерттеу институтының ғалымдары әзірлеген COVID-19-ға қарсы инактивтендірілген QazCovid-in вакцинасы клиникалық зерттеулердің ІІІ фазасынан өтуде.

Зерттеулерге үш мың адам қатысады. COVID-19-ға қарсы инактивтендірілген QazCovid-in вакцинасының негізіне инактивтендірілген вирус пен зиянсыз адъювант алынған.

Сондықтан препарат вакциналық препараттардың басқа түрлерімен салыстырғанда кепілді түрде қауіпсіз болып табылады. QazCovid-in вакцинасы жануарларға (ақ тышқандар, егеуқұйрықтар, сириялық алаботалар, қояндар, күзендер және макака-резус маймылдары) клиникаға дейінгі сынақтардан өтті.

Клиникалық зерттеулердің бірінші фазасы 18 бен 50 жас аралығындағы 44 еріктіге, ал клиникалық зерттеулердің ІІ фазасы 18 жастан асқан 200 еріктіге жүргізілді.

«Клиникалық зерттеулердің I/II фазаларының аралық есептерінің нәтижелері COVID-19-ға қарсы отандық QazCovid-in вакцинасының қауіпсіздігі мен иммуногенділігін көрсетті. Отандық QazCovid-In вакцинасы бойынша клиникалық зерттеулердің І және ІІ фазаларының аралық есебі алынды, оның нәтижелері бойынша бір және екі рет бұлшықет ішіне енгізгенде жақсы төзімділік пен қауіпсіздік атап өтілді. SARS-CoV-2 вирусына қатысты вакцинаның жоғары иммуногендік белсенділігі анықталды, ол екі рет вакцинациядан кейін айқынырақ байқалады», – деп атап өтті Денсаулық сақтау министрлігінде.

Бүгінгі күні әртүрлі жас топтарындағы, оның ішінде тәуекел топтарындағы 3 000 еріктіге клиникалық зерттеулердің ІІІ фазасы жүргізілуде, клиникалық зерттеулер Алматы мен Тараздағы клиникалық базаларда жүргізілуде.