Қатысуға 104 мыңға жуық өтініш берілді.

Бірыңғай ұлттық тестілеу (ҰБТ) 2022 жылғы 22 ақпанға дейін жалғасады, деп хабарлайды Total.kz.

Бұған дейін ҰБТ-ны 10 қаңтардан 10 ақпанға дейін өткізу жоспарланған болатын, алайда елде төтенше жағдай режимінің енгізілуіне байланысты мерзімдер ауыстырылды. Биыл талапкерлерге қолайлы жағдай жасау үшін де, тестілеу тапсыру процесінің ашықтығын күшейту үшін де бірқатар жаңалықтар енгізілді, деп атап өтті ҚР Білім және ғылым министрлігінде.

«Мәселен, ерекше білім беру қажеттіліктері бар түлектерге 2022 жылы қосымша уақыт беріледі. Көру, есту, тірек-қимыл аппаратының қызметі бұзылған талапкерлер негізгі 240 минуттан басқа, тест тапсырмаларын орындау үшін қосымша 40 минут алады. Яғни, олар ҰБТ-ны басқаларға қарағанда ұзағырақ, 4 сағат 40 минут ішінде тапсыра алады. Сонымен қатар, ерекше талапкерлерге арналған тапсырмалардың мазмұнына да өзгерістер енгізілді. Олар үшін суреттер, диаграммалар мен сызбаларсыз тест нұсқалары әзірленді. Мұндай өзгерістер ерекше білім беру қажеттіліктері бар үміткерлерге ҰБТ тапсыруды айтарлықтай жеңілдетеді», – деді ҚР БҒМ Ұлттық тестілеу орталығының директоры Руслан Емельбаев.

Тестілеу «1 компьютер – 2 камера – 1 тестіленуші» қағидаты бойынша өткізіледі. Талапкердің жұмыс орнында негізгі камерадан басқа, дыбысты жазу және тестіленушінің қимылдарын тіркеу үшін қосымша фронтальды веб-камера орнатылады. Фронтальды веб-камера талапкердің жеке басын сәйкестендіруге және ҰБТ кезінде адамдарды ауыстыруды болдырмауға мүмкіндік береді. Сондай-ақ, бұл емтихан тапсыру барысын бақылау және тестілеудің ашықтығын қамтамасыз ету үшін қажет.

Пәндер саны өзгеріссіз қалады: үш міндетті және екі таңдау пәні. Тест тапсырмаларының саны – 120. Оның ішінде Қазақстан тарихы бойынша – 15, математикалық сауаттылық бойынша – 15, оқу сауаттылығы бойынша – 20 және екі бейіндік пән бойынша 35 тапсырмадан. Тестілеудің жалпы уақыты – 4 сағат (240 минут). Максималды балл саны – 140.

Тестілеуге кіріскен кезде қол және рамалық типтегі металл іздегіштер қолданылады. Бұл талапкерлердің қауіпсіздігін қамтамасыз ету үшін де, ережелерді бұзудың және тыйым салынған заттарды (телефондар, шпаргалкалар және т.б.) алып кірудің алдын алу үшін де қажет. Қатысушылардан тыйым салынған заттар табылған жағдайда, тестілеу автоматты түрде тоқтатылады.

Тестілеуді өткізу кезінде аудиторияның (компьютерлік сыныптың) ауданына және бейнебақылауға байланысты рұқсат етілген магниттік толқындар шегінде ұялы және радиоэлектрондық байланыс сигналдарын басатын құрылғылар қолданылады.

«ҰБТ-2022 аяқталғаннан кейін күнтізбелік жылдың соңына дейін бейнежазбаларға талдау жүргізіледі. Тыйым салынған заттарды пайдалану және ережелерді бұзу фактілері анықталған жағдайда, талапкердің ҰБТ нәтижелері жойылады. Қаңтардағы ҰБТ қорытындысы бойынша ақылы негізде оқу мүмкін. Түлектер гранттарға жазғы тестілеу қорытындысы бойынша үміткер бола алады», – деп атап өтті ҚР БҒМ.