Астанада жеке мекемелерде мектепке дейінгі орындардың жетіспеушілік қаупі бар.

Астанада жеке мекемелерде мектепке дейінгі орындардың жетіспеушілік қаупі бар. Бұл туралы Астана кәсіпкерлер палатасының директоры Бейсен Жолболдиев мәлімдеді, деп хабарлайды Total.kz тілшісі.

Спикердің айтуынша, жеке балабақша иелері биылғы желтоқсанда мемлекеттік тапсырыс алу конкурсына қатыса алмайтынына алаңдаулы, себебі өзгерген талаптарға сәйкес басқа құжаттармен қатар конкурстық құжаттама құрамында «медициналық көмек көрсету (медициналық қызмет көрсету) шарты болмаған жағдайда медициналық қызметке лицензияны» ұсынуы тиіс.

«Оң санитарлық-эпидемиологиялық қорытындының болуы жеке мектепке дейінгі ұйымдардың толыққанды жұмыс істеуіне мүмкіндік береді. Медициналық қамтамасыз ету – білім беру ұйымының штатында медицина қызметкерінің болуы, медицина қызметкері болмаған жағдайда емханамен шарт талап етіледі. Медициналық кабинетке лицензияның қажеттілігі негізделмеген», – деді Жолболдиев Астана кәсіпкерлерінің құқықтарын қорғау жөніндегі кеңестің кезекті отырысында.

Сонымен қатар, объективті себептермен тұрғын үй қорынан шығарылмаған жалдамалы үй-жайларда жұмыс істейтін мектепке дейінгі ұйымдарға санитарлық-эпидемиологиялық бақылау департаменті санитарлық-эпидемиологиялық қорытынды беруден бас тартады.

«Қалыптасқан жағдайда қалада мектепке дейінгі орындардың жетіспеушілік қаупі туындайды, орта есеппен 15-16 мың бала жеке балабақшаларда орнынан айырылуы мүмкін», – деп қорытындылады Жолдобалиев.