Полицейлер бөгде адамдарға ресімделген екі мың несиені анықтады.

Ішкі істер министрлігінің ресми өкілі Нурдильда Ораз полицейлер анықтаған интернет-алаяқтық фактілері туралы айтты, деп хабарлайды Total.kz тілшісі.

«Интернеттегі алаяқтардың айла-тәсілдері күн сайын өзгеріп отырады. Ішкі істер министрлігінің сақтық шараларын сақтау қажеттігі туралы ескертулеріне қарамастан, көптеген адамдар алаяқтардың құрбанына айналады. Ағымдағы жылдың 9-15 тамыз аралығында елімізде ақпараттық технологияларды, оның ішінде интернет-алаяқтықты пайдалана отырып жасалатын қылмыстардың алдын алу, анықтау және жолын кесуге бағытталған «Алаяқтыққа қарсы іс-қимыл» жедел-профилактикалық акциясы өткізілуде», – деді Нурдильда Ораз ІІМ-дегі брифингте.

Нәтижесінде бір апта ішінде 270 құқық бұзушылық анықталды.

Оның ішінде интернет пайдаланушыларға қатысты 230 алаяқтық фактісі, ақпараттық технологияларды пайдалана отырып жасалған алты ұрлық, ақпаратқа заңсыз қол жеткізудің төрт фактісі және қылмыстың 30 басқа түрі тіркелді.

Іс-шара барысында бұрын жасалған 433 қылмыс, оның ішінде интернет пайдаланушыларға қатысты 426 алаяқтық және АТ-технологияларды пайдалана отырып жасалған алты ұрлық анықталды.

Мониторинг барысында 664 заңсыз ресурс анықталды.

Жалпы, жыл басынан бері құқық қорғау органдары интернет-алаяқтықтың 13 мыңнан астам жағдайын тіркеді.

Оның бес мыңы – алаяқтардың сауда платформалары мен интернет-сайттарда орналастыратын жалған жарнамалық хабарландырулар. Екі мың жағдайда алаяқтар азаматтардың жеке деректерін иемденіп, олардың атына онлайн-несие рәсімдеген.

Мобильді банкинг арқылы азаматтардың жеке деректері мен карточкалық шоттарының деректемелерін алумен бір мыңнан астам алаяқтық әрекеттер жасалған.