Ұлттық аккредитация орталығы заң талап еткендей, арнайы бланкіде 550 кәсіпкерге аккредитация аттестаттарын бермеген.

Сынақ зертханалары мен сертификаттау органдары қағаз бюрократиясынсыз жұмысқа рұқсаттарды цифрлық түрде ала алады, деп хабарлады Жоғары аудит палатасының (ЖАП) баспасөз қызметі, деп хабарлайды Total.kz тілшісі.

«Сәйкестікті бағалау саласындағы аккредитация туралы» заңға өзгерістер енгізілді. Енді кәсіпкерлер аккредитация аттестаттарын электронды түрде – жедел және қағаз бюрократиясынсыз ала алады. Бұл Қазақстанда бизнес үшін цифрландыру мен рәсімдерді жеңілдету жолындағы тағы бір қадам», – деп хабарлады ЖАП-та.

Ведомство бұған дейін ҚР Сауда және интеграция министрлігі мен оның ведомстволық бағынысты ұйымдарының жұмысына мемлекеттік аудит жүргізілгенін, оның барысында Ұлттық аккредитация орталығы заң талап еткендей, арнайы бланкіде 550 кәсіпкерге аккредитация аттестаттарын бермегені анықталғанын еске салды.

ЖАП ақпараты бойынша, бұл аттестаттар сәйкестікті бағалауды жүргізетін ұйымдарға – сынақ зертханаларына, сертификаттау органдарына, инспекциялық және калибрлеу ұйымдарына беріледі.

Мұндай аттестат ұйымның құзыретті екенін, өнімнің, қызметтердің немесе өндірістік процестердің сапасын объективті және сенімді тексеру үшін қажетті жабдықтары, персоналы мен рәсімдері бар екенін ресми түрде растайды.

«Қатаң есептілік құжаттарына қойылатын талаптардың бұзылуы кәсіпкерлердің аккредитация аттестаттарының жарамсыз деп танылу қаупін тудырды. Осы бұзушылықты жою және болашақта рәсімді жеңілдету үшін ЖАП Сауда министрлігіне Цифрлық даму министрлігімен бірлесіп қолданыстағы заңнамаға өзгерістер енгізуді және аттестаттарды беру процесін цифрлық форматқа көшіруді тапсырды», – деп түсіндірді баспасөз қызметінде.

Сәйкестікті бағалау – бұл өнімнің, қызметтердің немесе процестердің белгіленген талаптарға сәйкестігін тексеру процесі. Мысалы, тамақ өнімдерінің сапасын санитарлық нормалар бойынша тексеру, тұрмыстық техниканы қауіпсіздікке сертификаттау, құрылыс материалдарын беріктікке сынау және т.б.