Әзірлеушілердің ұсынысы бойынша борыштық жүктеме коэффициентінің нормасы қайта қаралады.

Елде отандық автокөліктерге несие рәсімдеу тәртібі өзгереді, деп хабарлайды Total.kz тілшісі.

ҚР Қаржы нарығын реттеу және дамыту агенттігі банктік және микроқаржылық қызметті реттеу мәселелері бойынша ҚР кейбір нормативтік құқықтық актілеріне тиісті түзетулер дайындады.

«1 сәуірден бастап ағымдағы жылдың соңына дейін Қазақстанда жаңа автокөлік құралын сатып алу мақсатында, осы автокөлік құралының кепілімен қамтамасыз етілген несие беру кезінде борыштық жүктеме коэффициентін есептеу жүргізілмейтін норма қолданылады», – делінген хабарламада.

Әзірлеушілердің ұсынысы бойынша бұл норма ұзартылып, кеңейтілетін болады.

Атап айтқанда, түзетулермен 2025 жылғы 1 қаңтардан бастап 2026 жылғы 31 желтоқсанды қоса алғанда кезеңде мынадай мақсаттар үшін несие беру кезінде қарыз алушының борыштық жүктеме коэффициентінің ең жоғары деңгейін сақтау талабы қолданылмайды:

  • пайдаланылмаған және ҚР-да алғаш рет тіркелетін, осы автокөлік құралының кепілімен қамтамасыз етілген жаңа автокөлік құралын сатып алу;
  • осы автокөлік құралының құнының 50%-дан астам бастапқы жарнасымен, осы автокөлік құралының кепілімен қамтамасыз етілген автокөлік құралын сатып алу;
  • үш жылға дейін пайдаланылған, осы автокөлік құралының құнының 30%-дан астам бастапқы жарнасымен, осы автокөлік құралының кепілімен қамтамасыз етілген автокөлік құралын сатып алу мақсаттары үшін;
  • тұрғын үй құрылыс жинақ жүйесі шеңберінде берілетін несиелер.