Құжат заң бастамашыларының қатысуымен комитеттің кеңейтілген отырысында жұмыс тобының 10 отырысында қаралып, талқыланды.

Сенаторлар пленарлық отырыста әйелдердің құқықтарын қамтамасыз ету және балалардың қауіпсіздігі туралы заңға енгізілетін түзетулерді екі оқылымда мақұлдады, деп хабарлайды Total.kz тілшісі.

«Аталған жолдауда мемлекет басшысы кәмелетке толмағандарға қатысты зорлық-зомбылықтың кез келген нысаны үшін жазаны қатаңдатуды, сондай-ақ білім беру мекемелерінде психологиялық қолдау қызметін институционалдық тұрғыдан күшейтуді, бірыңғай сенім телефонын ұйымдастыруды және зорлық-зомбылық пен буллинг құрбандарына көмек көрсетудің тиімді бағдарламасын әзірлеуді тапсырды, бұл қарауға ұсынылған заңдарда көрініс тапты», – деп хабарлады сенатор Жанна Асанова.

Оның айтуынша, заңның мақсаты – әйелдердің құқықтарын қамтамасыз ету және балалардың қауіпсіздігі мәселелері бойынша мемлекеттік саясаттың құқықтық, экономикалық, әлеуметтік, институционалдық және ұйымдастырушылық негіздерін жетілдіру.

Депутат заңның негізгі міндеттерін атап өтті:

  • ұрып-соғуды және денсаулыққа қасақана жеңіл зиян келтіруді Қазақстанның Әкімшілік құқық бұзушылық туралы кодексінен Қылмыстық кодексіне ауыстыру арқылы криминализациялау;
  • 106-бап «Денсаулыққа қасақана ауыр зиян келтіру» және 107-бап «Денсаулыққа қасақана орташа ауырлықтағы зиян келтіру» бойынша бас бостандығын шектеу түріндегі жазаны алып тастау арқылы жауапкершілікті қатаңдату;
  • кәмелетке толмағандарға қатысты физикалық зорлық-зомбылық пен қатыгез қарым-қатынасқа байланысты қылмыстар бойынша тараптардың татуласу мүмкіндігін жою;
  • кәмелетке толмаған баланы өлтіргені, кәмелетке толмағанға қатысты зорлау және кәмелетке толмағанға қатысты сексуалдық сипаттағы зорлық-зомбылық әрекеттері үшін Қылмыстық кодекстің қолданыстағы нормаларында көзделген басқа баламалы жаза шараларын алып тастау арқылы өмір бойы бас бостандығынан айыруды белгілеу;
  • Қылмыстық кодекске 121-1 жаңа бабын енгізу арқылы 16 жасқа толмаған адамдарға сексуалдық сипаттағы қол сұғу әрекеттерін криминализациялау.

Сондай-ақ депутаттар бірқатар түзетулер енгізді, атап айтқанда, дәстүрлі отбасылық құндылықтарды нығайту және ілгерілету сияқты жаңа принциптермен неке-отбасы заңнамасының негіздерін кеңейту, сондай-ақ неке және отбасы институтын нығайту, әлеуметтік-экономикалық қолдау көрсету, қиын өмірлік жағдайдағы адамдарды (отбасыларды) анықтау және оларға жан-жақты қолдау көрсетуді ұйымдастыру жөніндегі жергілікті өкілді және атқарушы органдардың құзыретін кеңейту.

Отырыста заңда 15 заңнамалық актіге, оның ішінде жеті кодекс пен сегіз заңға өзгерістер мен толықтырулар енгізу көзделгені атап өтілді.