Құқық қорғау және арнайы органдардың тәжірибелі қызметкерлерінен ведомствоаралық тергеу-жедел тобы құрылды.

Абай облысындағы орман өртінен кейін екі қылмыстық іс қозғалды, деп хабарлайды Total.kz.

«9 маусымда Абай облысының орман алқабындағы өрт фактісі бойынша ҚР ҚК-нің 292-бабы 3-бөлігі бойынша («Өрт қауіпсіздігі талаптарын бұзу, абайсызда екі және одан да көп адамның өліміне әкеп соқтырған») сотқа дейінгі тергеу басталды. Мемлекет басшысының тапсырмасы бойынша қылмыстық іс арнайы прокурорлардың іс жүргізуіне қабылданды», – деп хабарлады ҚР Бас прокуратурасы.

Ведомство құқық қорғау және арнайы органдардың тәжірибелі қызметкерлерінен ведомствоаралық тергеу-жедел тобы құрылғанын қосты.

«Адамдардың қазасына және қоршаған ортаға елеулі зиян келтіруге әкеп соққан ауыр зардаптарды ескере отырып, арнайы прокурор қызметтік немқұрайлылық фактісі бойынша қылмыстық іс тіркеді», – деп нақтылады қадағалау органының баспасөз қызметі.

Оны тергеу аясында жауапты лауазымды тұлғалардың әрекеттеріне тиісті құқықтық баға берілетіні атап өтілді.