Интернет-сервистерді мониторингілеу және мемлекеттік органдармен ынтымақтасу міндетті негізде жүзеге асырылады.

«Онлайн-платформалар және онлайн-жарнама туралы» заң жобасы мәжіліс депутаттарымен бірінші оқылымда мақұлданды, деп хабарлайды Total.kz тілшісі.

Енді заңнамаға «онлайн-платформа пайдаланушысы» және «инфлюенсер (блогер)» — онлайн-платформалар арқылы кәсіпкерлік қызметпен айналысатын онлайн-платформа пайдаланушысы деген ұғымдар енгізіліп, олардың құқықтары мен міндеттері белгіленеді.

«Заң жобасында онлайн-платформаларда жалған ақпаратты таратуға, орналастыруға тыйым салу енгізіледі, сондай-ақ мемлекеттік тілді онлайн-платформалардың интерфейстеріне және модерациясына міндетті түрде интеграциялау көзделеді, бұл әлеуметтік желі алгоритмдеріне құқыққа қарсы контентті, сондай-ақ қазақ тіліндегі контентті қадағалауға мүмкіндік береді», — деп нақтыланады хабарламада.

Сонымен қатар, онлайн-платформа иелері үшін сенімсіз ақпаратпен және салықтан жалтарумен күресу бойынша мемлекеттік органдармен ынтымақтасу міндеті енгізіледі.

Ол үшін интернеттегі осы ресурсты пайдаланушылар санын анықтауға арналған бағдарламаны орнату және уәкілетті органмен өзара іс-қимыл жасау үшін өзінің заңды өкілін тағайындау талабы белгіленеді.

Егер онлайн-платформаларда құқыққа қарсы контент анықталса, онлайн-платформа өкіліне оны жою қажеттігі туралы хабарлама жіберіледі. Егер бұл талап орындалмаса, уәкілетті орган сервис қызметін шектеуге құқылы.