Бүгінде жасанды интеллект, Big data, онлайн-коммерция және киберқауіпсіздікті енгізу сияқты салаларды дамыту сұранысқа ие.

Орталық Азия – Үндістан саммитінде Қасым-Жомарт Тоқаев үндістандық компанияларды қазақстандық нарыққа шақырды, деп хабарлайды Total.kz тілшісі.

«Экономиканы цифрландыру әлемдік басты тренд болып қала береді. Қазақстанда электронды үкімет тиімді жұмыс істейді, экономиканың барлық жүйе құраушы секторларын цифрландыру, смарт-қалаларды, медицина мен білім беруді дамыту жобалары жүзеге асырылуда, банктік-қаржы жүйесінде цифрлық шешімдер сәтті қолданылуда», – деп еске салды Тоқаев.

Оның айтуынша, бүгінде жасанды интеллект, Big data, интернет заттары, онлайн-коммерция және киберқауіпсіздікті енгізу сияқты салаларды дамыту сұранысқа ие.

Сонымен қатар, мемлекет басшысы атап өткендей, Қазақстанда телекоммуникация, электронды өнеркәсіп саласындағы зертхана, сондай-ақ электронды техниканы құрастыру өндірістерін құру жобалары қызығушылық тудырады.

«Біз осы бағыттар бойынша өзара тиімді ынтымақтастыққа дайынбыз. Үндістандық компанияларды қазақстандық нарыққа шақырамыз. Қазақстан халқына Жолдауымда 2025 жылға қарай кемінде 100 мың жоғары білікті IT маман даярлау міндетін қойдым. Осыған байланысты бізге Үндістанның тәжірибесі, әсіресе Үндістанның IT және инженерлік кадрларды оқытудағы бай тәжірибесі қызықты. Практикалық қадам ретінде «Астана Хаб» халықаралық IT-стартаптар технопаркінің базасында Bagmane технологиялық паркі және басқа да үндістандық IT алыптарымен бірлесіп, Орталық Азия үшін инженерлік кеңсе мен ақпараттық технологиялар мектептерін ашуды ұсынамыз», – деп түсіндірді Қазақстан президенті.