Бұл сезім ағзадағы белгілі бір жүйелерді белсендіреді.

Даттық Орхус университетінің зерттеушілері қорқыныш сезімінің денсаулыққа пайдалы болуы мүмкін екенін анықтады, деп хабарлайды Total.kz Medical Xpress-ке сілтеме жасап.

«Елестер үйі» атты ойын-сауық аттракционы арқылы жүргізілген эксперимент барысында ғалымдар қорқыныштың адам ағзасына әсерін зерттеп, оның жұқпалы қабыну қаупін төмендететінін анықтады.

«Зерттеушілер тобы орташа жасы 29,7 жас болатын 113 ересек қатысушыны бақылады. Олардың ішінде 69 әйел және 44 ер адам болды. Аттракцион шамамен бір сағатқа созылған кезде, барлық қатысушылардың жүрек соғу жиілігі бақыланып, қан анализі алынды – «Елестер үйіне» кірер алдында, одан кейін бірден және үш күн өткен соң», – деп нақтыланады дереккөзде.

Нәтижелер қорқыныштың ағзадағы белгілі бір жүйелерді белсендіріп, «ұрыс немесе қашу» реакциясын тудыратынын көрсетті, бұл аман қалудың іргелі механизмі болып табылады. Бұл өткір стресс сәттері жасушаларды жұмылдырып, иммундық жүйені ықтимал жарақатқа немесе инфекцияға дайындай алады. Зерттеу қорқыныштың тек өткір сезім сыйлап қана қоймай, иммундық реакцияларды модуляциялауға да ықпал ететінін растады.

«Алынған мәліметтер жануарларға жүргізілген алдыңғы зерттеулермен сәйкес келеді, олар да өткір стресстің денсаулыққа оң әсер етуі мүмкін екенін көрсетеді. Мұндай эксперименттер жұқпалы аурулардың алдын алу және емдеу саласында жаңа көкжиектер ашуы мүмкін», – деп атап өтеді басылым.

Қорқынышты ерікті түрде бастан кешіру, мысалы, ойын-сауық мекемелерінде, адреналин алудың ғана емес, сонымен қатар иммунитетті нығайтудың да тәсілі болуы мүмкін. Алайда ғалымдар қорқыныштың адам ағзасына әсер ету механизмдерін тереңірек түсіну үшін қосымша зерттеулер қажет екенін атап өтеді.