Әртүрлі банктерде орналастырылған депозиттер жеке кепілдендіріледі.

Қазақстандық депозиттерге кепілдік беру қорының кепілдігімен қазақстандықтардың 100% шоттары заңнамада белгіленген лимиттер шегінде қамтылған. Сонымен қатар, қазақстандық банктердегі депозиттік шоттардың 99,8% толық көлемде кепілдікпен қорғалған, деп хабарлайды Total.kz «Қазақстандық депозиттерге кепілдік беру қоры» АҚ баспасөз қызметіне сілтеме жасап.

«2022 жылғы қаңтарда теңгемен жинақ салымдары бойынша кепілдік өтемақысының ең жоғары мөлшері 15 миллион теңгеден 20 миллион теңгеге дейін ұлғайтылды. Бір банкте жинақ салымынан басқа депозиттердің өзге түрлері және/немесе шетел валютасындағы депозиті бар салымшылар үшін жиынтық өтемақы сомасы да 20 миллион теңгеге дейін көтерілді. Теңгелік депозиттердің неғұрлым «мобильді» түрлері, атап айтқанда мерзімді және мерзімсіз салымдар, теңгемен шоттар мен төлем карточкаларындағы ақша, сондай-ақ шартты салымдар мен теңгемен сұранысқа дейінгі салымдар ең жоғары сомасы 10 миллион теңгеге кепілдендіріледі. Шетел валютасындағы кез келген депозиттер ең жоғары сомасы 5 миллион теңгеге кепілдендіріледі», – делінген хабарламада.

Әртүрлі банктерде орналастырылған депозиттер жеке кепілдендіріледі. Бір банкте түрі мен валютасы бойынша әртүрлі бірнеше депозиті, оның ішінде теңгемен жинақ салымы бар ірі салымшылар үшін ҚДКҚ-дан жиынтық ең жоғары кепілдік 20 миллион теңгені құрайды (депозиттің әрбір түрі бойынша жеке белгіленген кепілдік өтемақысының ең жоғары мөлшері шегінде).

Қазіргі уақытта депозиттерге кепілдік беру жүйесіне екі ислам банкін қоспағанда, 20 қазақстандық екінші деңгейлі банк кіреді.

«ҚДКҚ өтемақы төлеу үшін үнемі резерв жинақтайды, сондықтан кез келген уақытта міндеттемелерді қабылдауға дайын. Қазір ҚДКҚ-ның арнайы резервінде 856 миллиард теңге жинақталған (қордың жарғылық капиталының 70% ескере отырып, олар да өтемақы төлеуге пайдаланылуы мүмкін). Жинақталған резерв жеке тұлғалардың депозиттік базасының шамамен 7% құрайды, бұл заңнамада көзделген 5% деңгейінен жоғары. Осылайша, қазақстандықтардың жинақтары заңнамада белгіленген кепілдік сомалары шегінде толық қорғалған», – деп сендірді қордың баспасөз қызметі.