Бір жылда зейнетақы жинақтарының көлемі 22,2%-ға өсті.

2024 жылғы қазанда қазақстандықтардың БЖЗҚ-дағы зейнетақы шоттарындағы зейнетақы активтері шамамен 21,2 триллион теңгені құрады, деп хабарлайды Total.kz тілшісі.

Осылайша, активтер 9 ай ішінде 3,3 триллион теңгеге (немесе 18,5%-ға) өсті. Бір жылда зейнетақы активтері 4 триллион теңгеге (немесе 23%-ға) өсті.

«Міндетті зейнетақы жарналары (МЗЖ) есебінен қалыптасқан зейнетақы жинақтары 2024 жылғы 1 қазандағы жағдай бойынша шамамен 20,4 триллион теңгені құрап, бір жылда 22,2%-ға өсті. Міндетті кәсіптік зейнетақы жарналары (МКЗЖ) есебінен зейнетақы жинақтарының сомасы – 628,6 миллиард теңгеден астам (бір жылдағы өсім – 14,4%). Ерікті зейнетақы жарналары (ЕЗЖ) бойынша жинақтар бір жылда ең жоғары өсімді (44,8%) көрсетіп, 7,1 миллиард теңгеден астамды құрады», – делінген ақпараттық хабарламада.

2024 жылғы 1 қаңтардан бастап салымшылардың (алушылардың) зейнетақы шоттарына қосымша қаражат – жұмыс берушінің міндетті зейнетақы жарналары (ЖБМЗЖ) түсе бастады. 2024 жылдың 9 айында ЖБМЗЖ есебінен зейнетақы жинақтарының сомасы шамамен 170 миллиард теңгені құрады.