Неліктен Іле ауданының әкімі ұсталды – прокуратура

Алматы облысының прокуратурасы Іле ауданында орналасқан қоқыс полигонының қызметін тексеру нәтижесінде әкім Бағдат Қарасаевтың ұсталғанын хабарлады, деп хабарлайды Total.kz тілшісі.

«Алматы облысының прокуратурасы мен Сыбайлас жемқорлыққа қарсы қызметі Іле ауданында орналасқан қоқыс полигонының қызметіне бірлескен тексеру жүргізді. Жедел-іздестіру іс-шараларының нәтижесінде 2024 жылғы 3 қыркүйекте әкім Қарасаев Б.А. Қазақстан Республикасы Қылмыстық-процестік кодексінің 128-131-баптары тәртібімен сыбайлас жемқорлық әрекетіне күдікпен ұсталды», – делінген прокуратура хабарламасында.

Бағдат Қарасаевқа кәсіпкерлік қызметке заңсыз қатысу, лауазымдық өкілеттіктерін асыра пайдалану және теріс пайдалану, мемлекеттік мүдделерге зиян келтірді деген айыптар тағылды.

«Аталған қылмыстар мүлкін тәркілеумен 10 жылға дейін бас бостандығынан айыру түріндегі жазаны көздейді. 2024 жылғы 4 қыркүйекте прокуратура қылмыстық істің материалдарын бұлтартпау шарасын санкциялау үшін сотқа жіберді», – деп хабарлады қадағалау органы.

Еске салайық, 4 қыркүйек таңертең әлеуметтік желілерде Сыбайлас жемқорлыққа қарсы қызметі Алматы облысы Іле ауданының әкімін «лауазымдық өкілеттіктерін теріс пайдалану және билікті немесе лауазымдық өкілеттіктерді асыра пайдалану» үшін ұстағаны туралы ақпарат пайда болды.

Бағдат Қарасаев Алматы облысы Іле ауданының әкімі лауазымына 2018 жылғы қыркүйекте тағайындалған.

Ол 1964 жылғы 12 маусымда дүниеге келген. Алматы теміржол көлігі инженерлері институтын бітірген. Мамандығы – жол қатынасы инженері. Еңбек жолын №1 кәсіптік-техникалық училищеде оқытушы болып бастаған. Училище директорына дейін жеткен. «Алакөл-Агро» ЖШС, «ТSС-Агро» ЖШС, «Тау-Самал Ltd.» компаниясы» ЖШС және «Қайыңды» ЖШС директоры, Алакөл ауданы әкімінің орынбасары және басшысы болған. 2011 жылғы мамырдан бастап Алматы облысы әкімі аппаратын басқарған. 2015 жылғы қарашадан бастап Талдықорған қаласының әкімі лауазымын атқарған. 2018 жылғы мамырда Алматы облысы әкімінің кеңесшісі болды.