Тергеу барысында «Рамазан» айында «ауызашар» жасау деген желеумен жергілікті ұйым жақтастары насихат жүргізіп, жақтастарының санын көбейту үшін діни жиындар өткізгені анықталды.

Шымкентте ҰҚК департаментінің үйлестіруімен радикалды-экстремистік «Хизб-ут-Тахрир» ұйымының ұяшығы анықталды, деп хабарлады қала прокуратурасының баспасөз қызметі, Total.kz тілшісі хабарлайды.

«Қала аумағында прокуратураның үйлестіруімен Шымкент қаласының ҰҚК Департаменті жедел-іздестіру іс-шараларын жүргізу барысында 22 адамнан тұратын радикалды-экстремистік «Хизб-ут-Тахрир» ұйымының конспиративті ұяшығы анықталды», – делінген хабарламада.

Ұяшықты әзірлеу барысында ағымдағы жылдың наурыз-сәуір айларында «Рамазан» айында «ауызашар» жасау деген желеумен радикалды-экстремистік ұйымның жергілікті жақтастары насихат жүргізіп, жақтастарының санын көбейту үшін діни жиындар өткізгені анықталды.

Ведомство тінту барысында 7 тыйым салынған діни кітап, 10-нан астам қолжазба және мәтіндік діни мазмұндағы парақшалар, 6 ұялы телефон, 4 ноутбук табылып, алынғанын қосты.

Аталған факті бойынша ҚК 256-бабы 1-бөлігі («Терроризмді насихаттау немесе терроризм актісін жасауға жария шақыру») және ҚК 259-бабы («Террористік немесе экстремистік қызметті ұйымдастыру мақсатында адамдарды жалдау немесе дайындау не қаруландыру») бойынша сотқа дейінгі тергеу басталғаны атап өтілді.

Қала прокуратурасы елдің конституциялық құрылысын бұзу мақсатында радикалды-экстремистік ұйымдарға кіруді насихаттағаны немесе шақырғаны үшін қылмыстық жауапкершілік қарастырылғанын еске салды.